ఈ కథని వినిపించినవారు : రమ్య గీతిక
ఈ కథని ఇక్కడ వినండి ===> మిరపకాయ్ పొట్టోడి కథ!
అనగనగా ఒక ఊర్లో ఓ మిరపకాయ్ పొట్టోడు ఉండేవాడట. ఆ మిరపకాయ్ పొట్టోడు రోజూ తనకున్న సొరకాయంత సైకిలెక్కి ఊర్లోకి వెళ్లి చాలా కష్టపడి పని చేసి బోలెడు డబ్బులు సంపాయించి బాదంకాయంత బంగారం కొనుక్కున్నాడట. మిరపకాయ్ పొట్టోడికి ఈతకాయంత ఇల్లు ఉంటుందన్నమాట! ఆ ఈతకాయంత ఇంట్లో ఉన్న గచ్చకాయంత గదిలో ఓ మూలన ఉన్న బీరకాయంత బీరువాలో, తను సంపాదించిన ఆ బాదంకాయంత బంగారాన్ని దాచిపెట్టి, ఆ బీరకాయంత బీరువాకి తాటికాయంత తాళం వేస్తాడంట.
ఆ తరవాత ఓ రోజు మిరపకాయ్ పొట్టోడు తన సొరకాయంత సైకిలెక్కి పని మీద బయటికి వెళ్తాడన్నమాట! అప్పుడు ఓ దోసకాయంత దొంగోడు వస్తాడు మిరపకాయ్ పొట్టోడి ఈతకాయంత ఇల్లు దగ్గరికి. మిరపకాయ్ పొట్టోడు ఇంట్లో లేడు కదా అని చెప్పి ఆ ఈతకాయంత ఇంట్లోకి జొరబడిపోయి, గచ్చకాయంత గదిలోకెళ్ళి, ఓ మూలన ఉన్న బీరకాయంత బీరువాకి ఉన్న తాటికాయంత తాళం పగలగొట్టి, అందులో ఉన్న బాదంకాయంత బంగారాన్ని తీసుకుని పారిపోతాడు.
సాయంత్రానికి మిరపకాయ్ పొట్టోడు తన ఈతకాయంత ఇంటికొచ్చి, గచ్చకాయంత గదిలోకెళ్ళి, బీరకాయంత బీరువాకున్న తాటికాయంత తాళం పగలగొట్టేసి ఉందని చూస్తాడు. అందులో తను దాచుకున్న బాదంకాయంత బంగారం పోయిందని తెలుసుకునేసరికి పాపం మిరపకాయ్ పొట్టోడికి భలే బాధేస్తుంది. వెంటనే పోలీస్ స్టేషన్ కి వెళ్లి అక్కడున్న పొట్లకాయంత పోలీసుకి ఫిర్యాదు చేస్తాడు.. ఇలా తను కష్టపడి పని చేసి సంపాదించుకున్న బాదంకాయంత బంగారాన్ని తన ఈతకాయంత ఇంట్లో, గచ్చకాయంత గదిలో ఓ మూలన ఉన్న, బీరకాయంత బీరువాలో తాటికాయంత తాళమేసి దాచిపెట్టుకుంటే ఎవడో దోసకాయంత దొంగోడొచ్చి ఎత్తుకెళ్లిపోయాడని.
వెంటనే, ఆ పొట్లకాయంత పోలీసు తనకున్న మావిడికాయంత మోటారు సైకిలెక్కి గబగబా వెళ్లి దోసకాయంత దొంగోడిని వెతికి పట్టుకుని తెచ్చి, వాడి దగ్గరున్న బాదంకాయంత బంగారాన్ని లాక్కుని మిరపకాయ పొట్టోడికి ఇచ్చేస్తాడు. దోసకాయంత దొంగోడిని నాలుగు తన్నాక వాడిని జాంకాయంత జైల్లో పడేస్తారు.
అప్పుడు మిరపకాయ పొట్టోడు దోసకాయంత దొంగని పట్టుకుని బాదంకాయంత బంగారాన్ని తనకి తెచ్చిచ్చినందుకు పొట్లకాయంత పోలీసుని మెచ్చుకుని, ఆ తరవాత సొరకాయంత సైకిలేస్కుని, తన ఈతకాయంత ఇంటికెళ్ళి, గచ్చకాయంత గదిలో ఓ మూలనున్న బీరకాయంత బీరువాలో బాదంకాయంత బంగారాన్ని దాచిపెట్టి, దానికి తాటికాయంత తాళం వేస్కుని దాచుకుంటాడు.
ఇంకంతే ‘మిరపకాయ్ పొట్టోడు’ కథయిపోయింది. 
కొసమెరుపు: ఈ కథని ఒక్క పోలిక కూడా మిస్సవకుండా, తప్పు చెప్పకుండా మీరు చెప్పండి చూద్దాం. చిన్నప్పుడు నేనూ, మా తమ్ముడు ఎన్నిసార్లు చెప్పుకునేవాళ్ళమో యీ కథని. మధ్యలో ఏ ఒక్క పోలిక మర్చిపోయినా, తప్పు చెప్పినా ఓడిపోయినట్టే. మళ్ళీ మొదటినుంచీ చెప్పాల్సిందే! అలా అని మెల్లగా ఆలోచిస్తూ నెమ్మదిగా చెప్పకూడదు. గబగబా చెప్పెయ్యాలి. మీరూ ప్రయత్నిస్తారా మరి!?
[మధురవాణి -- http://madhuravaani.blogspot.com/]
Hi Madhura,
Very nice and beautiful story
ఇదేకధని కోంచెం మార్పులు చేర్పులతో మా బాబాయ్ చెప్పేవాడు మాకు…
అందులో
ఉల్లిపాయంత ఊరులో అని మొదలయ్యేది కధ..
ములక్కాడంత ముసలమ్మ…
దొండకాయంత దొంగోడూ…
పొట్లకాయంత్ పోలీసు..జిలకఱంత జీపేసుకువచ్చాడంటా.. దోండకాయంత దొంగోడిని పనసకాయంత పోలీస్ స్టేషన్ లో పెట్టే బెండకాయంత బేడీలేసీ ఎడాపెడా కొట్టాడంటా..
ఈ తగువంతా కొబ్బరికాయంత కోర్ట్ లో సెటిలయ్యిందటా అని ముగించేవాడు…
మీరు చెప్పినట్టూ ప్రతీ రోజూ చెప్పుకునేవాళ్ళం ఈ స్టొరీ.. చాలా సంవత్సరాల తర్వాత విన్నాను మళ్ళీ ఈరోజు.. చాలా థాంక్సండీ..
నా చిన్నప్పుడు కూడా ఇటువంటి కథ బాగా విని చెప్పుకున్నాము. ఈ కథకు ఎవరన్నా యానిమేషన్ చేసి పెడితే సూపరో సూపర్. నవతరంగం వారూ వింటున్నారా, ఓపెన్ యానిమేషన్ వారూ వింటున్నారా
ముందుగా మధురవాణికి ఈ కథను పూర్తిగా పొల్లు పోకుండా గుర్తు చేసినందుకు Thanks.
తర్వాత ఆడియో ప్రవేశ పెట్టినందుకు అభినందనలు.
ఈ గొంతు ఎక్కడో విన్నట్లుంది. క్రొత్తవారిది అయ్యి ఉండవచ్చు కూడా అనుకోండి.
గొంతు ఎవరిదో చెప్తే బావుంటుంది కదా?
“నవతరంగం వారూ వింటున్నారా, ఓపెన్ యానిమేషన్ వారూ వింటున్నారా?”
ఈ పిలుపు బావుంది. వీరు పిల్లల కోసం ఇప్పటికే ఏమైనా చేసి ఉన్నారా?
తెలియజేస్తే బావుంటుంది.
తెలుగు4కిడ్స్ amateur ప్రయత్నం ఇక్కడ.
http://www.youtube.com/watch?v=m9KD6lfTUgE
లలిత గారు,
తను రాసిన కథని ఈ కథని ఒక్క పోలిక కూడా మిస్సవకుండా, తప్పు చెప్పకుండా చెప్పానో లేదో మధుర గారు చెప్పాలి 
గొంతు నాదేనండి
- రమ్యగీతిక
@ఇందూ, రాజ్..
థాంక్స్!
@కిరణ్ గారూ,
అవునండీ ఈ కథకి ఎవరన్నా యానిమేషన్ చేస్తే చాలా బాగుంటుందండీ!
@లలిత గారూ,
మరోసారి థాంక్సండీ… మీ వల్లనే ఈ కథ ఎక్కువమందికి చేరుతోంది!
@ గీతిక గారూ,
చాలా చక్కగా చెప్పారు కథ! భలే మెల్లగా చెప్పారే! అదే నేనైతే సగం టైములోనే కథంతా చేప్పేసేదాన్నేమో..
గీతిక గారూ,
నేను కూడా రికార్డ్ చేశా ఈ కథని సరదాకి.. This is really fun!
మధుర గారు
ఇక పై మీ కథలను మీరే చెప్పాలండి.
గబ గబా చెబితే భలే ఉంటుంది టంగ్ ట్విస్టర్ లా ఉందికదా. మీరు రికార్డ్ చేసింది పంపించాల్సింది
గీతిక గారూ…కథ చాలా చక్కగా చెప్పారండి.
jyothirmayi gaaru, Thankyou
-kr geetika